Oʻzbekistonda har ming nafar tadbirkorning faoliyatini tekshirish va taftishlar soni 2,5 baravar koʻpaygan, shuningdek, tadbirkorlar va davlat organlari orasida nizolar koʻpaymoqda . Bu haqda adliya vaziri Ruslanbek Davletov jamoatchilikka hisobotida maʼlum qildi.
Vazirning qayd etishicha, tadbirkorning faoliyatini tekshirish va taftishlar soni ortishi — “eskicha tizim”.
“Har ming nafar tadbirkorning faoliyatini tekshirish va taftishlar soni 2,5 baravar koʻpaygan. Bu — eskicha tizim. Audit tizimiga oʻtganmiz, kommeral nazoratga oʻtyapmiz. Lekin baribir bu taftishlar bizda avtomatik shakllanadi”, — deydi u.
Davletovning soʻzlariga koʻra, sudlarda tadbirkorlar ishtirokida koʻrib chiqilayotgan nizolar soni 50 foizga oshgan.
“Bu yaxshi signal emas. Tadbirkorlar va davlat organlari orasida nizo koʻpaymoqda. Kim [tadbirkor] sudga borsa, asosiy tizim yaxshi ishlamayotganidan dalolat beradi”, — deydi u.
Shuningdek, Ruslanbek Davletovning aytishicha, davlat ehtiyojlari uchun yer uchastkalarini olib qoʻyish soni oʻtgan yilning mos davriga nisbatan ikki baravar oshgan.
