Oʻzbekistonda eksport hajmini 14 milliard dollarga yetkazish hisob-kitob qilingan. Bu haqda Shavkat Mirziyoyev Investitsiyalar va tashqi savdo vazirligi hamda Strategik rivojlanish agentligi faoliyati muhokamasi yuzasidan oʻtkazilgan yigʻilishda maʼlum qildi.
Qayd etilishicha, 2020 yilda mamlakatda eksport miqdori 9 milliard dollardan oshgan boʻlsa, 2021 yilda 12 milliard dollarni tashkil etgan. Eʼtiborlisi, bunda tayyor va yarim tayyor mahsulotlar ulushi sezilarli koʻpaygan.
Joriy yilda 9 milliard 500 million dollardan ziyod toʻgʻridan-toʻgʻri xorijiy sarmoyalarni oʻzlashtirish, 282 ta yirik va 9 mingdan ortiq hududiy loyihalar ishga tushirish moʻljallangan. Eksport hajmini 14 milliard dollarga yetkazish hisob-kitob qilingan.
Yigʻilishda mutasaddilar ushbu koʻrsatkichlarni tarmoq va hududlar kesimida taʼminlash chora-tadbirlari boʻyicha axborot berdi.
Davlat rahbari har bir investitsiya loyihasini doimiy nazoratga olib, tashabbuskorlarga koʻmaklashish va oʻz vaqtida ishga tushirish boʻyicha topshiriqlar berdi.
