Дам олиш куни ёки бўш вақт бўлганда фильм томоша қилиш ва маданий ҳордиқ чиқариш асабларни тинчлантиради, кайфият улашади. Шу сабабли, қуйида реклама ва маркетингга оид бўлган, кўпроқ камедия жанридаги 5 та фильм ҳақида сўз боради.
«Чекканингиз учун раҳмат» (Thank You for Smoking) 2005 йил
Фильм қаҳрамони Ник Нэйлорнинг иши осон эмас. У иложи борича чекиш учун лобби қилиши керак. Чекишнинг қизғин мухолифлари билан баҳслашиш ва чекишнинг фойдалилигини исботлашга ҳаракат қилиш бемаъни кўринади. Аммо бу Никнинг иши.
Шу билан бирга Ник телевидениедаги ток-шоуларда барчани чекишга ундаб, фильмларда сигаретани тарғиб қилиб, бу борада сезиларли натижаларга эришди. Бироқ, Никнинг ўзи ҳеч қачон чекишни фойдали машғулот деб ҳисобламаган.
Фильм 2005 йилда АҚШда суратга олинган. Драма ва комедия жанридаги фильм премьера қилингач сарфланган маблағдан 6 карра кўп фойда олиб келади.
«Жонслар оиласи» (The Joneses) 2009 йил
Ҳар жиҳатдан намунали Жонслар оиласи кичик шаҳарчага кўчиб ўтади ва ўзларининг турмуш тарзи билан дарҳол барчанинг эътиборини қозонади. Шаҳарча аҳолиси улар каби яшашни истаб қолади: улар каби кийиниш, қиммат гаджетлардан фойдаланиш ва ҳоказо.
Аммо, аслида, Жонслар ҳақиқий оила эмас. Йўқ, улар жосуслар ёки ўзга сайёралик ҳам эмас. Гап шундаки, уларнинг барчаси шунчаки маркетинг компаниясининг ходимлари, ёлланган ва шаҳарга ностандарт усулларда «идеал» турмуш тарзини ва шу билан бирга миллион хил маҳсулотни реклама қилиш учун юборилган. Воқеалар ривожи қизиқ бўлса, фильмни томоша қилинг.
«‘П’ авлоди» (Generation П) 2011 йил
Виктор Пелевиннинг романига асосланган «‘П’ авлоди» фильми асосан галлюцинацияларга асосланган. Фантастика ва драма жанрида суратга олинган фильм бош қаҳрамони Вавилен Татарский реклама агентлиги ходими сифатида ишлайди.
Татарский Ғарб брендларини тарғиб қилиб, уларни «рус менталитети»га мослаштириш билан шуғулланади.
«Муқаддас одам» (Holy Man) 1998
Фильм бир пайтлар машҳур бўлган «Дивандаги дўкон» телекўрсатуви қийин кунларни бошдан кечираётгани билан бошланади. Кўрсатув томошабинлар зерикарли рекламалардан чарчаган ва шоунинг рейтинги тобора пасайиб бормоқда. Унинг доимий раҳбари Рик Хейман вазиятдан чиқишга ҳаракат қилади, аммо ҳеч натижа бўлмайди.
Кўп сонли муаммоларига қўшимча равишда Рикнинг Жи исмли янги таниши яна бир бош оғриқ сифатида унинг ҳаётида пайдо бўлади. Оқ халат кийган бу ғалати одам мамлакат бўйлаб саёҳат қилади ва ўзининг қизиқарли ваъзлари билан бошқаларга мурожаат қилади. У одамларни ишонтира олиш қобилятига эга ва Рик бундан фойдаланиб қолишга уринади.
«Расм ва матн» (Art and copy) 2009 йил
Фильм реклама ва илҳом ҳақида. Унда энг нуфузли реклама берувчилар замонавий маданиятга катта таъсир кўрсатгани, лекин ушбу тенденция реклама саноатидан ташқарида мутлақо номаълум бўлгани акс эттирилган. Ҳужжатли фильм АҚШда суратга олинган.
Аввалроқ Gucci, McDonald’s каби дунёга машҳур брендларнинг тарихига оид 5 та фильм ҳақида батафсил маълумот берилганди.
