Давлат активларини бошқариш агентлиги директори Соҳибжон Муродов 8 октябрдаги матбуот анжуманида «Ўзбекистон почтаси» Wildberries’га ишончли бошқарувга берилгани ҳақидаги саволига рад жавобини берганди. «Бугунги кунда ишончли бошқарувга берилмаган», — деганди агентлик раҳбари.
У Wildberries вакилларининг почта кузатув кенгашига киритилишини компаниянинг тажрибасидан фойдаланиш ҳамда 360 млрд сўмгача фоизсиз қарз жалб қилиш режаси билан изоҳлаган. Муродовнинг айтишича, почтанинг ижро органи ва акциядори ўзгармаган, ҳамкорлик эса натижасига қараб давом эттирилади.
Telegram’даги КорпИнфо канали 11 октябр куни «Ўзбекистон почтаси»га оид бир корпоратив ҳужжатни эълон қилди. Бу — акциядорларининг 2026 йил 21 сентябрдаги навбатдан ташқари умумий йиғилиши 2-сон баёнидан кўчирма бўлиб, унда ишончли бошқарув шартномаси тилга олинган.
Ҳужжатда жамият устав капиталидаги давлат улушини ишончли бошқарувга бериш тўғрисидаги 2025 йил 30 декабрдаги 01/3-94-сонли Ишончли бошқарув шартномасининг 6.1-бандига ҳавола қилинган. Ушбу банд инобатга олинган ҳолда, «WB INT EXPORT» МЧЖ (Россиянинг Wildberries компанияси Ўзбекистондаги шуъбаси) томонидан таклиф этилган беш номзодни кузатув кенгашига сайлаш масаласи баён этилган.
Баён кўчирмасида WB INT EXPORT «Ўзбекистон почтаси» АЖдаги давлат акциялари пакетининг ишончли бошқарувчиси экани ҳамда қонунчилик ва мазкур шартномага мувофиқ акциядорнинг барча ҳуқуқларига эга бўлгани қайд этилган. WB INT EXPORT 2026 йил 11 августдаги ДДУ-8-сонли хати билан «Ўзбекистон почтаси» акциядорларининг навбатдан ташқари умумий йиғилишини чақириш ва кун тартибига кузатув кенгашининг янги таркибини сайлаш масаласини киритиш тўғрисида талабнома юборган.
Ҳужжатга кўра, «Ўзбекистон почтаси» Кузатув кенгашига Давлат активларини бошқариш агентлиги (давлат улуши эгаси) тўрт номзодни, WB INT EXPORT эса беш номзодни таклиф қилган. Йиғилиш якунида тўққиз аъзодан иборат янги таркиб уч йил муддатга сайланган.
Кузатув кенгашига WB INT EXPORT бош директори Акмал Примкулов, «РВБ» компаниясининг инвестициялар ва назорат департаменти директори Евгений Митин, юридик департаменти директори ўринбосари Эмил Хасянов, молиявий директори Павел Логунов ҳамда «ВБ Банк» ҳудудий ривожланишни бошқариш департаменти директори Александра Хмелёва киритилган.
Қолган тўрт ўринни Олег Пекос, Шаҳзод Усаров, Музаффар Астонақулов ва мустақил аъзо Roger Crook эгаллаган.
Шундай қилиб, эълон қилинган баённома кўчирмасида ишончли бошқарув шартномаси ва унга асосан амалга оширилган ваколатлар қайд этилган. Бу эса Муродовнинг 8 октябрдаги рад жавоби билан ҳужжатдаги маълумот ўртасидаги тафовутга изоҳ талаб қилади. Кўчирмада ишончли бошқарув шартномасининг бошқа шартлари, амал қилиш муддати ёки бекор қилингани ҳақида маълумот берилмаган.
Эслатиб ўтамиз, Давактив 3 октябр кунги баёнотида «Ўзбекистон почтаси» хусусийлаштирилгани ва 100 млрд сўм қарз олгани ҳақидаги хабарларни рад этган. Агентлик давлат улушини сотиб олишга Wildberries ва Uzum Market қизиқиш билдиргани, бироқ хусусийлаштириш бўйича ҳужжатлар расмийлаштирилмаганини маълум қилган.
