2026 yil 1 apreldan boshlab Oʻzbekistonda koʻchmas mulk va chiqqaniga 10 yildan oshmagan avtomobillar oldi-sotdi jarayonida hisob-kitoblarning yangi tartibi joriy etildi.
Endilikda bunday bitimlar bank orqali eskrou hisobvaraqdan foydalangan holda amalga oshiriladi. Bu shuni anglatadiki, endi pul xaridordan sotuvchiga toʻgʻridan toʻgʻri oʻtkazilmaydi. Bitimga qoʻshimcha ishtirokchi — bank jalb qilinadi. Bunda bank mablagʻlarni saqlab turadi va bitim yakunlanmaguncha ularni tomonlarning birortasiga ham oʻtkazmaydi.
Markaziy bank xabariga koʻra, 1 apreldan 7 maygacha boʻlgan davrda eskrou hisobvaraqlari orqali koʻchmas mulk va transport vositalari oldi-sotdisi boʻyicha bitimlar sezilarli darajada faollashdi.
Hisobot davrida jami 40 767 ta bitim rasmiylashtirilgan boʻlib, shundan 23 804 tasi transport vositalari, 16 963 tasi esa koʻchmas mulk oldi-sotdisiga toʻgʻri keldi.
Hududlar kesimida eng yuqori faollik Toshkent shahrida — 11 679 ta, Fargʻona viloyatida — 3940 ta hamda Samarqand viloyatida — 3614 ta bitim bilan qayd etildi.
Kuchli beshlikni 3128 ta bitim bilan Andijon hamda 2856 ta bitim bilan Namangan viloyatlari yakunladi.
Regulyator tomonidan qayd etilishicha, eskrou mexanizmi oldi-sotdi jarayonlarida hisob-kitoblarning xavfsizligi, shaffofligi va ishonchliligini taʼminlashga xizmat qilmoqda.
