Мол-мулкка эгалик ҳуқуқи календарь йил мобайнида бир мулкдордан бошқасига ўтган тақдирда, мол-мулк солиғи:
- аввалги мулкдор томонидан шу йилнинг 1 январидан эътиборан у мол-мулкка бўлган мулк ҳуқуқини йўқотган ойнинг бошланишига қадар,
- янги мулкдор томонидан эса унда мулк ҳуқуқи вужудга келган ойдан эътиборан тўланади.
Юқоридагилардан келиб чиққан ҳолда, масалан, фуқаро 2025 йил 13 февралда квартира сотиб олган бўлса 2025 йилнинг 1 февралидан 31 декабрига қадар 2025 йил учун мол-мулк солиғини тўлайди.
Шунингдек, фуқаро агар янги бинодан квартира сотиб олган бўлса, янги иморатлар, бинолар ва иншоотлар бўйича солиқ мулк ҳуқуқи юзага келган ойдан эътиборан тўланади.
Агар сиз кўчмас мулк мерос бўлиб ўтган бўлса, мерос бўйича ўтган мол-мулк учун солиқ меросхўрда мулк ҳуқуқи вужудга келган ойдан эътиборан тўланади.
Агар уй бузилган бўлса — солиқ солиш объекти йўқ қилинган, вайрон бўлган ёки бузиб ташланган тақдирда, солиқни ундириш мол-мулк йўқ қилинган, вайрон бўлган ёки бузиб ташланган ойдан эътиборан тугатилади. Солиқ суммасини қайта ҳисоб-китоб қилиш маҳаллий давлат ҳокимияти органи ёки фуқароларнинг ўзини ўзи бошқариш органи томонидан берилган йўқ қилинганлик, вайрон бўлганлик ёки бузиб ташланганлик фактини тасдиқловчи ҳужжатлар мавжуд бўлган тақдирда, амалга оширилади.
Агар солиқ имтиёзлари мавжуд бўлса, календарь йил мобайнида имтиёзларга бўлган ҳуқуқ вужудга келган (тугаган) тақдирда, солиқни қайта ҳисоб-китоб қилиш ушбу ҳуқуқ вужудга келган (тугаган) ойдан эътиборан амалга оширилади.
