Oʻzbekistonda gazdan noqonuniy foydalanish boʻyicha 192 ta holat aniqlangan. Bu haqda Energetika vazirligi xabar berdi.
Maʼlum qilishicha, 2022 yil dekabr oyining oʻtgan davri davomida Energetika vazirligi huzuridagi “Oʻzneftgazinspeksiya”, huquqni muhofaza qiluvchi organlar va ishchi guruh aʼzolari ishtirokida oʻtkazilgan nazorat tadbirlari davomida 192 ta holatda isteʼmolchilar tomonidan tabiiy gazdan noqonuniy foydalanish holatlariga chek qoʻyildi.
Bunday noqonuniy holatlar natijasida davlat manfaatlariga yetkazilgan zarar miqdori 10,2 mlrd soʻmni va gaz hajmi 10,2 mln kub metrni tashkil etgan.
Maʼlumot uchun, ushbu hajmdagi tabiiy gaz oʻrtacha 17 mingga yaqin hovli uylardagi xonadonlarning kuz-qish mavsumida bir oylik isteʼmolini tashkil qiladi.
Noqonuniy foydalanish holatlari asosan Navoiy viloyatida (2,4 mlrd soʻm), Jizzaxda (2,0 mlrd soʻm), Buxoroda (0,9 mlrd soʻm), Qashqadaryoda (0,267 mlrd soʻm), Toshkent viloyatida (0,8 mlrd soʻm) va Toshkent shahrida (0,165 mlrd soʻm) aniqlangan.
