Oʻzbekiston respublika tovar-xom ashyo birjasining davlat xaridlari boʻyicha tanlov va tender elektron savdo tizimida bir qator yangi xizmatlar joriy etildi. Bu haqda birja matbuot xizmati xabar berdi.
Maʼlum qilinishicha, asosiy yangiliklardan biri tanlov va tender boʻyicha elektron savdolar natijalarini davlat buyurtmachisi tomonidan qabul qilinishi bilan bogʻliq. Xususan, elektron bayonnoma shakllantirilganidan soʻng davlat buyurtmachisi akseptni qabul qilishi yoki bekor qilishi mumkin.
Aksept rad etilgan taqdirda, davlat buyurtmachisi oʻz qarorini asoslab berishi kerak boʻladi. Shuningdek, savdo gʻolibi ham akseptni qabul qilishi yoki rad etishi mumkin, rad etilgan taqdirda aksept avtomat ravishda zaxiradagi gʻolibga yoʻllanadi.
Bundan tashqari, byudjet buyurtmachilaridan tashqari korporativ buyurtmachilar ham davlat xaridlari boʻyicha etender.uzex.uz elektron savdo tizimida tuzilgan bitimlar uchun qoʻshimcha kelishuvlar imzolash imkoniyatiga ega boʻlishdi. Qoʻshimcha kelishuvlar orqali buyurtmachi yoki ishtirokchining rekvizitlarini, shuningdek, bitim narxini ham oʻzgartirish mumkin.
Avvalroq tovar-xom ashyo birjasida bugʻdoy va shakar narxlari pasaygani haqida xabar qilingandi.
