Oʻzbekiston 2022 yilning birinchi yarim yilligida umumiy qiymati 449,4 million dollarga teng boʻlgan meva-sabzavot eksport qildi. Bu haqda Prognozlashtirish va makroiqtisodiy tadqiqotlar instituti matbuot xizmati Kommers.uzʻga xabar berdi.
Maʼlum boʻlishicha, 2022 yilning yanvar-iyun oylari davomida xorijiy mamlakatlarga umumiy qiymati 449,4 million AQSH dollariga teng boʻlgan 820,8 ming tonna meva-sabzavot mahsulotlari eksport qilingan. Mazkur koʻrsatkich 2021 yilning shu davridagiga nisbatan 11,6 foiz koʻp.
Taʼkidlanishicha, meva-sabzavotlar eksportida qiymati jihatidan uzum (mayizni qoʻshgan holda) eng katta ulushga ega — 10,9 foiz. Undan keyingi oʻrinlarni pomidor — 9,4 foiz, mosh — 9,1 foiz, gilos — 7,4 foiz, karam — 7,2 foiz, piyoz — 5,2 foiz, shaftoli — 4,0 foiz, qovun va tarvuz — 3,6 foiz egallagan. 2022 yilning yanvar-iyun oylarida eksportning umumiy hajmida meva-sabzavotlarning ulushi 4,5 foizni tashkil etgan.
Meva-sabzavotlarning asosiy qismi Rossiya (36,3 foiz), Qozogʻiston (24,5 foiz), Xitoy (9,8 foiz), Pokiston (4,9 foiz), Qirgʻiziston (4,8 foiz) Afgʻoniston (3,5 foiz), Belarus (2,5 foiz) kabi mamlakatlarga eksport qilingan.
Avvalroq Oʻzbekistonda eng koʻp meva-sabzavot eksport qilayotgan hududlar boʻyicha maʼlumot berilgandi. Unga koʻra, xorijga meva-sabzavot eksport qilayotgan hududlar orasida Fargʻona viloyati (206,4 million dollar), Toshkent viloyati — (140 million dollar) va Samarqand viloyati — (108 million dollar) yetakchilik qilgan.
