Prezident Shavkat Mirziyoyev 4,5 ming gektar yer uchastkalarini savdoga chiqarishga koʻrsatma berdi. Bu haqda 31 mart kuni oʻtkazilgan videoselektor yigʻilishida maʼlum qilindi.
Maʼlum qilinishicha, yigʻilishda hudud va tarmoqlar rahbarlariga 2022 yil 1 apreldan boshlab davlat dasturlaridan tashqari byudjetdan ssuda berish va banklarga depozit qoʻyishni toʻxtatishga topshiriq berildi.
Har bir tarmoq va hudud rahbari bugundanoq aniq hisob-kitob qilib, uch kun muddatda oʻz rejalarini ishlab chiqishi kerakligi koʻrsatib oʻtildi. Shuningdek, Soliq va Bojxona qoʻmitalariga tushumlarni taʼminlash yuzasidan tegishli topshiriqlar berildi.
Bundan tashqari, oʻtgan haftada 1,5 mingdan ziyod davlat mulkini savdoga chiqarish boʻyicha imzolangan Prezident qarori ijrosini taʼminlash bilan bogʻliq vazifalar belgilab berildi.
Masalan, 2022 yil 1 mayga qadar 50 mingta (4,5 ming gektar) yer uchastkalarini savdoga chiqarish nazarda tutilgan. Biroq, Samarqandda hozirgi kungacha bor-yoʻgʻi 6 ta yer uchastkasi elektron savdolarga qoʻyilgan. Qolgan hududlarda esa bironta yer uchastkasi savdoga chiqarilmagan.
Ikki hafta muddatda ushbu yerlarni toʻliq auksionga chiqarib, 1 iyulga qadar ularning kamida 50 foizi sotilishini taʼminlash vazifasi qoʻyildi.
Avvalroq Oʻzbekistonda Rossiya, Ukraina va Belarus bilan ishlayotgan korxonalarga imtiyoz berilishi xabar qilingandi.
