Jahon banki (JB) mart oyi oxirigacha “islohotlarni qoʻllab-quvvatlash” uchun Kiyevga 350 million dollar ajratish masalasini koʻrib chiqadi.Bu haqda Jahon banki prezidenti Devid Melpas Ukraina Prezidenti Vladimir Zelenskiy bilan Myunxen xavfsizlik konferensiyasi doirasidagi uchrashuvda maʼlum qildi.
Melpasning taʼkidlashicha, keyingi moliyaviy yordamni ajratish qoʻshimcha islohotlar, jumladan, energetika va iqlim sohalarida ham amalga oshiriladi.
“Prezident Melpas Jahon banki davom etayotgan islohotlarni qoʻllab-quvvatlash uchun Ukrainaga 350 million dollargacha mablagʻ ajratish masalasini mart oyi oxirigacha kengashda koʻrib chiqishga tayyorlanayotganini tasdiqladi”, deyiladi xabarda.
Melpas va Zelenskiy, shuningdek, Jahon banki tomonidan Ukraina uchun energiya samaradorligi, infratuzilma, temir yoʻllar va iqtisodiyotni mustahkamlash sohalarida rejalashtirilgan bir qator loyihalarni muhokama qildi.
Bundan tashqari, uchrashuvda Ukrainaning joriy inqiroz tufayli moliyaviy xarajatlarining oshishi va energiya narxining oshishi koʻrib chiqildi.
