Saudiya Arabistoni valiahd shahzodasi, bosh vazir oʻrinbosari va Iqtisodiy rivojlanish kengashi rahbari Muhammad bin Salmon 13 fevral kuni Saudi Aramco davlat neft kompaniyasining 4 foiz aksiyalari mamlakat suveren investitsiya jamgʻarmasi (Public Investment Fund) boshqaruvi ostiga oʻtkazilishini eʼlon qildi.
Ayni paytda bu ulush deyarli 80 milliard dollarga baholanmoqda. Bu haqda The Wall Street Journal xabar berdi.
Saudiya Arabistoni 2030 yilgacha iqtisodiyotni diversifikatsiya qilish — Saudi Vision 2030 loyihasi doirasida oʻzining ulkan neft aktivlarini monetizatsiya qilishni maqsad qilgan va tushumlarni boshqa tarmoqlarga yoʻnaltiradi.
Uglevodorodlar eksporti bilan bogʻliq boʻlmagan kompaniyalar va tarmoqlarni moliyaviy qoʻllab-quvvatlash uchun Saudiya Arabistonining valiahd shahzodasi Muhammad bin Salmon boshchiligidagi Public Investment Fund tashkil etilgan.
Hozirda suveren jamgʻarma 480 milliard dollarga yaqin aktivlarni nazorat qiladi. 2025 yilga borib bu miqdorni 1 trillion dollardan ortiqroqqa oshirish rejalashtirilgan.
Avvalroq Saudi Aramco Osiyo va AQSH uchun neft narxini oshirishi xabar qilingandi.
