Oʻzbekistonning yalpi ichki mahsuloti 2021 yil 7,4 foizga oʻsdi. Bu haqda Prezident Shavkat Mirziyoyev mahallabay ishlashning yangi tizimini yoʻlga qoʻyish va aholi bandligini taʼminlash boʻyicha joriy yildagi ustuvor vazifalarga bagʻishlangan videoselektor yigʻilishida maʼlum qildi.
Davlat rahbari faol islohotlar, tadbirkorlikni rivojlantirish va mahallabay ishlash boshlangani natijasida, 2021 yili yalpi ichki mahsulot 7,4 foizga oʻsganini qayd etdi.
Hududlarda 100 mingta yangi tadbirkor ish boshladi. Oʻzini oʻzi band qilganlar soni 700 mingga koʻpayib, 1,2 millionga yetdi.
“2022 yilni ʻInson qadrini ulugʻlash va faol mahalla yiliʻ deb eʼlon qildik. Shu bois, bu yil barcha mahallalarda tub oʻzgarishlar yili boʻlishi kerak”, — dedi Prezident.
Taʼkidlanishicha, “mahallabay” ishlash tizimi orqali “temir daftar”dagi 583 ming ehtiyojmand oila doimiy daromad bilan taʼminlandi.
