Toshkent viloyati Chirchiq shahrida 2022 yil yanvar oyida “Chirchiq-Ximgrad industrial parki” tashkil etiladi. Bu haqda Yangi Oʻzbekistonning 2022–2026 yillarga moʻljallangan taraqqiyot strategiyasi toʻgʻrisidagi Prezident farmoni loyihasida soʻz boradi.
Loyihaga koʻra, park kimyo va gaz-kimyosi sohalarini rivojlantirish va tabiiy gazni qayta ishlash darajasini 8 foizdan 20 foizga yetkazish orqali kimyo sanoatida 2 milliard dollarlik mahsulot ishlab chiqarish maqsadlari doirasida tashkil etiladi.
Qayd etilishicha, park tashkil etilishiga Iqtisodiy taraqqiyot vazirligi, Investitsiyalar va tashqi savdo vazirligi, Moliya vazirligi, “Oʻzkimyosanoat” AJ hamda “Oʻzbekneftgaz” AJ masʼul hisoblanadi. Bosh vazir oʻrinbosari Jamshid Qoʻchqorov esa jarayonni nazorit qiladi.
Avvalroq Shavkat Mirziyoyev Mirzo-Ulugʻbek tumanidagi IT-park qurilishi bilan tanishgani xabar qilingandi.
