Oʻzbekistonda 2022 yil ilm-fan va innovatsiyaga asoslangan agroxizmatlar koʻrsatish tizimini takomillashtirish uchun 17,1 million dollar ajratish rejalashtirilmoqda. Bu haqda Oʻzbekistonning 2022–2026 yillarga moʻljallangan taraqqiyot strategiyasi loyihasida soʻz boradi.
Qayd etilishicha, Fargʻona, Samarqand, Jizzax, Andijon, Navoiy, Xorazm viloyatlari agroxizmatlari markazlarini tashkil etish va qishloq xoʻjaligi mahsuloti ishlab chiqaruvchilarni xizmatlar bilan qamrab olish darajasini 30 foizga yetkazish koʻzda tutilgan.
Loyihaga koʻra, xar bir hududiy agroxizmatlar markazlariga 12 nafardan (8 ta yoʻnalishda, oʻsimliklar himoyasi va karantini, zootexniya, mexanizatsiya, agrokimyo-tuproqshunoslik, agronomiya, veterinariya, iqtisodiyot, irrigatsiya), jami 72 nafar xodim jalb etiladi.
Shuningdek, sohaga 10 nafar xorijiy ekspertni jalb etgan holda agroxizmatlar markazlari uchun yetuk kadrlarni tayyorlash, ularni doimiy malakasini oshirish rejalashtirilgan. Buning uchun esa 1,3 million dollar ajratiladi.
Mablagʻlarning barchasi Xalqaro moliya institutlari tomonidan ajratiladi.
