“Toshshahartransxizmat”ning bir yoʻlovchini tashish xarajatlari 3254,0 soʻmni tashkil qiladi. Bu haqda korxona matbuot xizmati xabar berdi.
“Toshshahartransxizmat” avtobus saroylari faoliyatining 2021 yil 9 oy yakunlari boʻyicha bir yoʻlovchi tashish uchun shakllangan xarajatlari toʻgʻrisida maʼlumot eʼlon qilindi.
Maʼlum qilinishicha, ushbu davrda tashilgan yoʻlovchilar soni 102,7 million nafarni tashkil qilgan. Shuningdek, avtobuslarning yoʻnalishlarda yurgan masofasi 64 million 310,5 ming kilometrga teng.
Qayd etilishicha, yoʻlovchilarni tashish uchun sarflangan jami xarajatlar 334 milliard 188,0 million soʻmni tashkil qilgan. Shu bilan birga, amaldagi yoʻl kira tarifi — 1400 soʻm.
Taʼkidlanishicha, 1 yoʻlovchi uchun xarajatlar — 3254,0 soʻmga teng. Shuningdek, 1 kilometr uchun xarajatlar — 5196,5 soʻmni tashkil etadi.
Avvalroq Toshkent jamoat transportida yoʻlkira narxi koʻtarilishi xabar qilingandi. Shuningdek, Oʻzbekistonda shaharlararo yoʻl haqi yil boshiga nisbatan salkam 10 foizga oshgani haqida xabar berildi.
