Европа Иттифоқининг аксарият давлатлари Венгрия учун мўлжалланган иттифоқнинг мувозанатлашган ривожланиш жамғармасидан 6,3 миллиард евро миқдоридаги маблағларни музлатишга келишиб олишди. Бу ҳақда Politico хабар берди.
Дастлаб, Европа иттифоқи бу пуллар Венгрияда порахўрлик авж олишига таъсир қилиши мумкинлигидан қўрқиб, 7,5 миллиард еврони музлатиб қўйишни режалаштирган эди. Будапешт бунга норозилик билдирган ҳолда, Иттифоқнинг Украина учун ажратилган 18 миллиард евролик ёрдам пакетини блоклаган. Шундан сўнг, Будапештнинг Киев учун ёрдамга қўйган ветосидан воз кечиши эвазига бу миқдор камайтирилди.
Шу билан бирга, Европа Иттифоқи Венгрияга пандемиядан кейинги тикланиш учун 5,8 миллиард евро миқдорида грантлар ажратишга қарор қилган.
