Oliy majlis senatida 25 noyabr kuni Byudjet va iqtisodiy islohotlar masalalari qoʻmitasi majlisi boʻlib oʻtdi. Unda “Tashabbusli byudjet” jarayonlarida gʻolib deb topilgan loyihalar oʻz vaqtida amalga oshirilishi holatini oʻrganish natijalari yuzasidan masʼul vazirlik hamda hududiy rahbarlarning axborotlari eshitildi. Bu haqda Senat axborot xizmati xabar berdi.
Majlisda tashabbusli byudjet jarayonlarini amalga oshirishda ayrim muammolar va kamchiliklarga yoʻl qoʻyilganligiga toʻxtalib oʻtildi.
Xususan, hududlarda Byudjet kodeksi talablariga toʻliq amal qilinmay, jamoatchilik fikri asosida shakllantirilgan tadbirlarni moliyalashtirishga tuman (shahar) byudjetlari qoʻshimcha manbalarining kamida 30 foizini yoʻnaltirishda sustkashlikka yoʻl qoʻyilgan.
Shuningdek, “Tashabbusli byudjet” jarayonlarining ikkinchi mavsumi doirasida respublika boʻylab 162 ta mahallada yashovchi fuqarolardan loyihalar taklif etilmagan. Jumladan, Samarqand shahrida 95 ta mahalla, Andijon va Toshkent viloyatlarida 22 tadan mahalla, Qoraqalpogʻistonda 18 ta hamda Sirdaryo viloyatida 5 ta mahalla “Tashabbusli byudjet” jarayonida ishtirok etmagan.
Maʼlum qilinishicha, Davlat moliyaviy nazorati inspeksiyasi tomonidan jamoatchilik fikri asosida shakllantirilgan tadbirlarni moliyalashtirishga yoʻnaltirilgan mablagʻlar maqsadli foydalanilishi yuzasidan oʻtkazilgan nazorat tadbirlari natijasida 257 ta loyiha boʻyicha 5,6 milliard soʻmlik qonun buzilishi holatlari aniqlangan. Natijada Bosh prokuratura tomonidan “Tashabbusli byudjet” jarayonida qonun buzilishiga yoʻl qoʻygan 255 nafar shaxs intizomiy, 15 nafar shaxs maʼmuriy javobgarlikka tortilib, qoʻpol qonun buzilishi holatlari yuzasidan 5 ta jinoyat ishi qoʻzgʻatilgan.
