Oʻzbekiston bosh vazir oʻrinbosari – turizm va madaniy meros vaziri Aziz Abduhakimov Germaniya turistik assotsiyasiyasi (DTV – Deutscher Tourismusverband) prezidenti Norbert Fiyebig boshchiligidagi delegatsiya aʼzolarini qabul qildi.
Qayd etilishicha, Oʻzbekistonning turistik salohiyatini Yevropada keng targʻib qilish va yevropalik sayyohlar oqimini koʻpaytirish maqsadida “Destination Forum” (“DTV”ga aʼzo eng yirik va salohiyatli turistik tashkilotlarning turistik forumi) loyihasini amalga oshirish masalasi muhokama qilindi. Shuningdek, Oʻzbekistonning turizm salohiyatini katta tajribaga ega boʻlgan “DTV” assotsiatsiyasining marketing resurslaridan foydalangan holda keng targʻib qilish, Oʻzbekiston dunyodagi eng xavfsiz davlatlardan biri ekanligini dunyoga koʻrsatish, Germaniyadan Samarqand shahriga toʻgʻridan-toʻgʻri charter reyslarni yoʻlga qoʻyish, birgalikda “Uzbekistan” turistik brendini Yevropaga olib chiqish, Oʻzbekistonga DTV tarkibiga kiruvchi eng yirik va eng salohiyatli turistik tashkilotlar hamda turistik operatorlar tashrifini tashkil etish kabi masalalar yuzasidan muzokaralar olib borildi.
Uchrashuv yakunida Turizm va madaniy meros vazirligi hamda DTV oʻrtasida turizm sohasidagi hamkorlikni yanada mustahkamlash va rivojlantirishga qaratilgan barcha masalalarni amalga oshirish maqsadida oʻzaro media reja loyihasi ishlab chiqish, shuningdek, 2023 yilning aprel oyida “Destination Forum” loyihasini amalga oshirish yuzasidan kelishib olindi.
