Iqtisodiy tadqiqotlar va islohotlar markazi maʼlumotlariga koʻra, 2022 yilning 1 yanvaridan 30 sentyabrgacha boʻlgan davrda respublikada soliq tushumlari hajmi 2021 yilning mos davri bilan solishtirilganda 17,3 foizga oshgan.
Unga koʻra, Fargʻona (39,5 foiz), Samarqand (35,4 foiz), Sirdaryo (33,2 foiz), Xorazm (32,7 foiz), Buxoro (32,2 foiz) viloyatlarida, Qoraqalpogʻiston Respublikasida (33,4 foiz) va Toshkent shahrida (42,2 foiz) soliq tushumlarining sezilarli oʻsishi qayd etildi.
Maʼlum qilinishicha, koʻrib chiqilayotgan davrda elektron hisobvaraqlar tizimini, onlayn kassa tizimini joriy qilishni kengaytirish hisobiga, shuningdek aholiga xarid qiymatining 1 foizini keshbek sifatida qaytarib berish tartibining joriy qilinishi natijasida qoʻshilgan qiymat soligʻi va aylanmadan olinadigan soliq tushumlari oʻsdi.
Shuningdek, iqtisodiy faollikning ortishi natijasida rentabellik darajasining oshishi subyektlar tomonidan toʻlanadigan foyda soligʻini 38 foizga oshirishiga sabab boʻldi.
Shu bilan birga, yil boshidan 30 sentyabrgacha boʻlgan davrda bojxona toʻlovlari boʻyicha tushumlar oʻtgan yilning mos davriga nisbatan 40,3 foizga oshdi. Tijorat banklari tomonidan berilgan kreditlar hajmi ham oʻtgan yilning mos davriga nisbatan 6,6 foizga oʻsgan.
