Bu haqda AOKAda oʻtkazilgan brifingda Qurilish sohasida standartlashtirish respublika markazi bosh direktori Abulqosim Abduxoliqov maʼlum qildi.
Taʼkidlanishicha, Qurilish vazirligi huzurida tashkil etilgan mazkur institut davlat muassasasi shaklida faoliyat olib boradi hamda qurilish va shaharsozlik sohasida ilmiy-tadqiqotlar asosida texnik jihatidan tartibga solish, meʼyorlash va standartlashtirish ishlarini olib boradi.
Shuningdek, qurilish sohasida narxlarni shakllantirish va uning mexanizmlarini aniqlash masalalari boʻyicha mazkur institut vakolatli davlat muassasasi hisoblanadi. Institutda BIM-server va axborotlarni qayta ishlash markazi faoliyatini yoʻlga qoʻyiladi. Axborot modellarining markazlashgan banki shakllantiririladi va yuritib boriladi.
Qayd etilishicha, qurilish materiallari va xizmatlar boʻyicha ishlab chiqaruvchi tomonidan taklif etilayotgan narxlarning elektron katalogini joriy qilish ham koʻzda tutilgan.
Institut tomonidan yuritiladigan milliy klasifikator va elektron katalog Moliya vazirligi, Davlat soliq qoʻmitasi, Davlat statistika qoʻmitasi, Davlat bojxona qoʻmitasi, Tovar-xom ashyo birjasi va boshqa vazirlik va idoralarning elektron maʼlumotlar bazalari bilan integratsiya qilingan holda amalga oshiriladi.
Xabarda aytilishicha, 2023 yil 1 martdan boshlab markazlashgan manbalar hisobidan moliyalashtiriladigan obyektlarning smeta qiymatini aniqlash Qurilish vazirligi tomonidan joriy etiladigan “Qurilish resurslari milliy klassifikatori” elektron platformasi asosida amalga oshiriladi.
