Transport vazirligida 29 sentyabr kuni Saudiya Arabistoni Podshohligi haj va umra ishlari vaziri Tavfiq bin Favzon ar-Rabiya boshchiligidagi delegatsiya bilan uchrashuv boʻlib oʻtdi. Bu haqda Transport vazirligi matbuot xizmati xabar berdi.
Taʼkidlanishicha, muzokaralar davomida Saudiya Arabistoni Podshohligi va Oʻzbekiston oʻrtasida havo transporti sohasida hamkorlikni rivojlantirish, ikki mamlakat oʻrtasida muntazam aviaqatnovlar sonini oshirish va turizm yoʻnalishida aloqalarni kengaytirish masalalari muhokama etilgan.
Uchrashuvda Oʻzbekiston tomonidan ikkala davlat oʻrtasida keng qamrovli hamkorlikni mustahkamlash maqsadida kelgusida Saudiya Arabistoni aviakompaniyalarini “Ziyorat turizmi” dasturi doirasida tarixiy shaharlar, yaʼni Samarqand, Buxoro hamda Urganch shaharlariga muntazam aviareyslarni yoʻlga qoʻyish taklif etilgan.
