Oʻzbekiston isteʼmol sektorida iyul oyida deflyatsiya kuzatildi. Davlat statistika qoʻmitasi iyul oyi uchun inflyatsiya darajasi boʻyicha maʼlumot berdi.
Unga koʻra, 2022 yilning iyul oyida isteʼmol bozoridagi narxlarning oʻrtacha darajasi 0,1 foizga pasaygan. 2022 yilning dastlabki yetti oyida isteʼmol bozorida narxlarning oʻsish surʼati 6,4 foizga yetgan, oʻrtacha oylik oʻsish surʼati esa 0,9 foizni tashkil etgan.
Qayd etilishicha, yillik nisbatda (2021 yilning iyul oyiga nisbatan) isteʼmol sektorida narxlarning oʻsish surʼati 12,3 foizni tashkil etgan. 2022 yilning iyul oyida narxlar va tariflar oshishi boʻyicha yetakchilik nooziq-ovqat mahsulotlarga tegishli boʻlib, oy davomida ularning narxlari oʻrtacha 0,9 foizga oshgan. Xizmatlar oy davomida 0,3 foizga qimmatlashgan.
Mavsumiylik oziq-ovqat mahsulotlari narxlari dinamikasini aniqlashda hal qiluvchi omil boʻlgan. Ularning narxlari oy davomida 1,0 foizga arzonlashgan.
Avvalroq iyun oyida isteʼmol bozoridagi tovarlar va xizmatlar oʻrtacha 0,9 foizga qimmatlashgani xabar qilingandi.
Qayd etilishicha, 2022 yilning iyun oyida isteʼmol bozoridagi tovarlar va xizmatlar oʻrtacha 0,9 foizga qimmatlashgan. 2022 yilning birinchi yarim yilligida isteʼmol bozorida narxlarning oʻsish surʼati 6,5 foizga yetgan.
Maʼlumotlarga koʻra, birinchi 6 oyda oʻrtacha oylik oʻsish surʼati 1,1 foizni tashkil etgan. Yillik nisbatda (2021 yilning iyun oyiga nisbatan) isteʼmol sektorida narxlarning oʻsish surʼati 12,2 foiz boʻlgani taʼkidlandi.
