Oʻzbekistonda 2022 yil sentyabrdan boshlab “dekret” toʻlovlarining bir qismini davlat byudjeti hisobidan toʻlash tartibi joriy etilmoqda. Bu haqda Shavkat Mirziyoyev raisligidagi videoselektor yigʻilishida maʼlum qilindi.
Yigʻilishda ishchi-xodimlarning samarali faoliyati uchun 3 ta asosiy ijtimoiy masalada (kasallik, ishsiz qolish, homiladorlik) bosqichma-bosqich kafolatli himoyalash tizimi joriy etilishi taʼkidlangan.
Misol uchun, norasmiy sektorda ayollar ulushi 57 foizni tashkil qilmoqda.
“Sababi, koʻplab ish beruvchilar homiladorlik nafaqasini toʻlashda ortiqcha xarajat qilmaslik uchun ayollarni rasmiy ishga olmaslikka harakat qiladi. Bu borada 2022 yil sentyabrdan boshlab ʻdekretʻ toʻlovlarining bir qismini davlat byudjeti hisobidan toʻlash tartibi joriy etilmoqda”, deb yozadi Prezident matbuot xizmati.
Mazkur ishlarni tizimli yoʻlga qoʻyish maqsadida 1 sentyabrdan Moliya vazirligi huzurida Ijtimoiy sugʻurta jamgʻarmasi tashkil etiladi. Jamgʻarmaga joriy yilda byudjetdan 170 milliard soʻm ajratiladi.
Mutasaddilarga 1 avgustga qadar “dekret” pullarini toʻlash jarayonini toʻliq raqamlashtirish topshirildi.
Avvalroq 1 maydan pensiya va nafaqalar 12 foizga oshirilishi maʼlum qilingandi.
