Iqtisodiy taraqqiyot vazirligi tomonidan 1–31 mart kunlari Qoʻyliq va Chorsu dehqon bozorlarida asosiy isteʼmol tovarlarining ulgurji narxlari boʻyicha kuzatuv natijalari eʼlon qilib borildi. Vazirlik asosiy turdagi qishloq xoʻjaligi va goʻsht mahsulotlarining ulgurji narxlari oʻzgarishi yuzasidan tahliliy maʼlumot berdi.
Arzonlashgan mahsulotlar
Ushbu davr mobaynida bozorda kivi 2500 soʻmga, mandarin 1500 soʻmga, mosh 1250 soʻmga, kartoshka (import), lavlagi, turp 500 soʻmga hamda guruch (alanga) 250 soʻmga arzonlashgan.
Qimmatlashgan mahsulotlar
Bozorlarda uzum narxi 12 ming 500 soʻmga, qizil bulgʻori qalampiri 10 ming soʻmga, bodring (orzu) 8 ming soʻmga, anor 5 ming 500 soʻmga, apelsin va qizil bulgʻori qalampiri 5 ming soʻmga, pomidor 4 ming soʻmga, noʻxat 3 ming soʻmga, sarimsoq piyoz 2 ming 500 soʻmga, qovun, guruch (lazer) hamda pomidor (pushti) 2 ming soʻmga, piyoz 1200 soʻmga, nok va limon ming soʻmga hamda karam 850 soʻmga oshgan.
Bozorlarga eng koʻp keltirilgan mahsulotlar
Tezkor maʼlumotlarga asosan, Qoʻyliq bozoriga 1–31 mart kunlari hududlardan jami 26,3 ming tonna, xususan, 12,6 ming tonna kartoshka, 8,9 ming tonna piyoz, 1,4 ming tonna karam va 3,4 ming tonna sabzi keltirilgan.
Shundan, Toshkent viloyatidan 324 tonna kartoshka, 3411 tonna piyoz, 1379 tonna karam, 1038 tonna sabzi, Samarqanddan 4018 tonna, Jizzaxdan 740 tonna, Surxondaryodan 740 tonna (yangi hosil), Fargʻonadan 45 tonna piyoz, Surxondaryodan 597 tonna, Qashqadaryodan 572 tonna, Sirdaryodan 379 tonna, Jizzaxdan 250 tonna, Andijondan 235 tonna, Buxorodan 189 tonna va Xorazmdan 137 tonna sabzi mahsulotlari yetkazib berilgan.
Shuningdek, Qoʻyliq bozoriga Pokistondan 10 ming 175 tonna, Erondan 672 tonna, Qozogʻistondan 584 tonna, Afgʻonistondan 517 tonna va Qirgʻizistondan 318 tonna kartoshka keltirilgan.
Shu bilan birga, hududlardan Chorsu dehqon bozoriga 1–31 mart kunlari jami 467,6 tonna, shu jumladan 329,1 tonna mol goʻshti va 138,6 tonna qoʻy goʻshti keltirib sotilgan.
Avvalroq Oʻzbekiston dehqon bozorlaridagi minimal-maksimal narxlar maʼlum qilingandi. Shuningdek, fevral oyida jahon boʻylab oziq-ovqat narxlari rekord darajaga yetgani haqida xabar berildi.
