Iqtisodiy taraqqiyot vazirligi tomonidan 1–13 mart kunlari Qoʻyliq va Chorsu dehqon bozorlarida asosiy isteʼmol tovarlarining ulgurji narxlari boʻyicha kuzatuv natijalari eʼlon qilinib borildi. Vazirlik asosiy turdagi qishloq xoʻjaligi va goʻsht mahsulotlarining ulgurji narxlari oʻzgarishi yuzasidan tahliliy maʼlumot berdi.
Arzonlashgan mahsulotlar
Ushbu davr mobaynida bozorda mandarin 4000 soʻmga, kivi 1500 soʻmga, uzum 1000 soʻmga, mosh 750 soʻmga, lavlagi 650 soʻmga, turup 500 soʻmga hamda guruch (alanga) 250 soʻmga arzonlashgan.
Qimmatlashgan mahsulotlar
Bozorlarda yashil bulgʻori qalampiri narxi 9000 soʻmga, bulgʻori qizil qalampiri 6000 soʻmga, noʻxat 3000 soʻmga, bodring va guruch (lazer) 2000 soʻmga, pomidor 500 soʻmga, karam 450 soʻmga hamda kartoshka (mahalliy) 150 soʻmga oshgan.
Bozorlarga eng koʻp keltirilgan mahsulotlar
Tezkor maʼlumotlarga asosan, Qoʻyliq bozoriga 1–13 mart kunlari hududlardan jami 10,4 ming tonna mahsulot, xususan, 5,3 ming tonna kartoshka, 3,4 ming tonna piyoz, 518 tonna karam va 1,2 ming tonna sabzi keltirilgan.
Shundan, Toshkent viloyatidan 159 tonna kartoshka, 1120 tonna piyoz, 518 tonna karam, 426 tonna sabzi, Samarqand viloyatidan 2040 tonna piyoz, Jizzax viloyatidan 191 tonna piyoz, Qashqadaryo viloyatidan 303 tonna, Surxondaryo viloyatidan 287 tonna, Sirdaryo viloyatidan 187 tonna, Buxoro viloyatidan 19 tonna, Andijon va Xorazm viloyatlaridan 7 tonna hamda Jizzax viloyatidan 6 tonna sabzi mahsulotlari yetkazib berilgan.
Shuningdek, Qoʻyliq bozoriga Qozogʻistondan 364 tonna, Qirgʻizistondan 142 tonna, Afgʻonistondan 336 tonna, Pokistondan 3980 tonna va Erondan 310 tonna kartoshka keltirilgan.
Shu bilan birga, hududlardan Chorsu dehqon bozoriga 1–13 mart kunlari jami 178,8 tonna, shu jumladan 126,6 tonna mol goʻshti va 52,2 tonna qoʻy goʻshti keltirib sotilgan.
Avvalroq Oʻzbekiston dehqon bozorlaridagi minimal-maksimal narxlar maʼlum qilingandi. Shuningdek, fevral oyida jahon boʻylab oziq-ovqat narxlari rekord darajaga yetgani haqida xabar berildi.
