Oʻzbekistonda charm-poyabzal va moʻynachilik korxonalari uchun 5 foizlik kredit ajratiladi. “Charm-poyabzal va moʻynachilik sohalarida tayyor mahsulot ishlab chiqarishni qoʻllab-quvvatlashga doir qoʻshimcha chora-tadbirlar toʻgʻrisida”gi Prezident qarori qabul qilindi.
Qarorga muvofiq, 2026 yilgacha charm-poyabzal, jun va moʻynachilik eksporti 2,8 baravarga koʻpaytiriladi.
Tuman (shahar)larda terini qayta ishlashga hamda tayyor charm-poyabzal va moʻyna mahsulotlarini ishlab chiqarishga ixtisoslashgan kichik sanoat zonalari tashkil qilinadi.
Kichik sanoat zonalarini tashqi muhandislik-kommunikatsiya tarmoqlari bilan taʼminlash uchun 2022-2023 yillarda 90 milliard soʻm mablagʻ ajratiladi.
Charm-poyabzal va moʻynachilik sohalaridagi investitsiya loyihalarini moliyalashtirish uchun banklarga 60 million dollar miqdoridagi kredit liniyasi ochiladi.
Banklar tadbirkorlarga yangi uskuna va texnologiyalarni olish uchun 3 yillik imtiyozli davr bilan 7 yil muddatgacha 5 foiz stavkada kreditlar ajratadi.
Qarorga koʻra, charm-poyabzal, moʻynachilik sohasi korxonalari va chorva mollarini soʻyish va terini qayta ishlovchi tashkilotlar uchun soliq va bojxona toʻlovlari boʻyicha imtiyozlar 2023 yil 1 yanvardan 2026 yil 1 yanvargacha uzaytirildi.
2022 yil 1 apreldan 2025 yil 1 yanvargacha quyidagilar uchun ijtimoiy soliq 1 foiz undiriladi:
- yalpi tushumda bolalar, ayollar va sport poyabzallari, sunʼiy (eko) charm, furnitura, poyabzal qoliplari va tagliklari tushumning kamida 60 foizni tashkil qilgan ishlab chiqaruvchilar;
- yalpi tushumining umumiy hajmida poyabzallar, charm-attorlik mahsulotlari va moʻynadan tayyorlangan buyumlar eksportidan tushgan tushumning hajmi 80 foizni tashkil qilgan ishlab chiqaruvchilar.
