Oʻzbekistonda 1 martdan boshlab barcha yuridik shaxslar sement, sement klinkeri va qurilish oynasini cheklovlarsiz eksport qilishi mumkin. Bu boʻyicha Prezident qarori qabul qilindi.
Prezidantining “Uy-joylar qurilishini va qurilish materiallari sanoatini qoʻllab-quvvatlashning qoʻshimcha chora-tadbirlari toʻgʻrisida”gi qarori qabul qilindi.
Unga koʻra, 2022 yil 1 martdan boshlab barcha yuridik shaxslarga sement,sement klinkeri va qurilish oynasini cheklovlarsiz toʻgʻridan-toʻgʻri shartnomalar asosida (kvotasiz) eksport qilishga ruxsat beriladi.
Shuningdek, 2024 yil 1 yanvarga qadar Eksportni rivojlantirish agentligi tomonidan mahalliy eksport qiluvchi korxonalarga (ularning vakolatli vakillariga) qurilish materiallarini barcha mamlakatlarga, shu jumladan chegaradosh davlatlarga avtomobil, temir yoʻl va havo transportida tashish harajatlarining 50 foizigacha miqdorini kompensatsiya qilishga subsidiyalar taqdim etiladi.
Avvalroq Oʻzbekistonda sement ishlab chiqaruvchilarning foyda soligʻi stavkasini pasaytirish taklif qilingani haqida xabar berilgandi.
