Rossiya Markaziy banki “Konservativ tijorat bank”ning (KTB) litsenziyasini qaytarib oldi. Bu haqda tartibga soluvchi organ saytidagi bayonotda soʻz boradi. KTB WebMoney pul oʻtkazmalari tizimining hisob-kitob banki hisoblanadi.
Qayd etilishicha, bankning litsenziyasi 11 fevraldan boshlab bekor qilingan. Markaziy bank KTB jinoiy faoliyatdan olingan daromadlarni legallashtirish va terrorizmni moliyalashtirishga qarshi kurashish sohasida qonun buzilishlariga yoʻl qoʻyganini litsenziya bekor qilinishiga sabab sifatida koʻrsatgan.
Bundan tashqari, hisobotda aytilishicha, bank federal qonunlar va Markaziy bankning bank faoliyatini tartibga soluvchi qoidalarini buzgan, shuning uchun regulyator oʻtgan yil davomida bir necha marta choralar koʻrgan, xususan, ayrim operatsiyalarni amalga oshirishga cheklovlar qoʻygan.
“Kredit tashkilotining faoliyati uning ʻsoyadagiʻ qimor biznesiga, moliya bozorining noqonuniy ishtirokchilariga xizmat koʻrsatishda ishtirok etish xavfi ortishi bilan tavsiflanadi”, deyiladi Rossiya banki bayonotida.
Regulyatorga koʻra, KTB aslida “anʼanaviy bank ishi” bilan shugʻullanmay, elektron tijorat xizmatlarini koʻrsatmagan va mijozlarning shaffof boʻlmagan mablagʻ manbalarini, shuningdek, ularning iqtisodiy asoslarini oʻrganmagan.
Markaziy bank 1,4 million rubldan koʻp boʻlmagan miqdorda KTBning har bir omonatchisiga mablagʻlar 100 foiz qaytarilishini koʻrsatgan. Mablagʻlar qaytarilishi bilan “Omonatlarni sugʻurtalash agentligi” davlat korporatsiyasi shugʻullanadi.
Bankni “Omonatlarni sugʻurtalash agentligi”ning vaqtinchalik maʼmuriyati boshqaradi, KTBning ijro etuvchi organlari esa vakolatlaridan mahrum etilgan.
