Oʻzbekistonda 2021 yil tovarlar va xizmatlar importi sezilarli oshdi. Bu haqda Markaziy bank taqdim etgan 2021 yil yakunlari boʻyicha toʻlov balansi joriy operatsiyalari hisobining dastlabki koʻrsatkichlarida soʻz boradi.
Qayd etilishicha, tovarlar importi 23 milliard dollarni (2020 yilda 19 milliard dollar, 2019 yilda 21,2 milliard dollar) tashkil etib, 2020 yilga nisbatan 21 foiz yoki 4 milliard dollarga oshdi.
Tovarlar importining asosiy qismi “mashinalar, uskunalar, mexanizmlar” — 6,2 milliard dollar (2020 yilda 6 milliard dollar), “qimmatbaho boʻlmagan metallar va ulardan buyumlar” — 3,2 milliard dollar (2021 yilda 2,4 milliard dollar), “kimyo sanoati mahsulotlari” — 2,9 milliard dollar (2020 yilda 2,4 milliard dollar) va “transport uskunalari” — 2,8 milliard dollar (2020 yilda 2,2 milliard dollar) tovar guruhlariga toʻgʻri keldi.
Xizmatlar importi 2020 yilga nisbatan 33 foiz yoki 1,2 milliard dollarga oshib, 4,7 milliard dollarni (2020 yilda 3,5 milliard dollar, 2019 yilda 5,4 milliard dollar) tashkil etdi.
Bunda, xizmatlar importi tarkibida 2020 yilga nisbatan safarlar komponenti 664 million dollarga, transport xizmatlarida esa 453 million dollarga oʻsdi. 2019 yilda safarlar komponenti 33 foizga, transport xizmatlari esa 10 foizga yuqori boʻlgan.
